ஒரு தேவதையும் சில பொய்களும்

தேவதை வெண்ணிற ஆடையில் வருமென்பது பொய்,
அன்று பச்சை நிற சுடிதார் அணிந்திருந்தது.

தேவதை ரெக்கை கொண்டு பறக்குமென்பது பொய்,
அன்று அரசுப் பேருந்திலும் சென்றது.

தேவதையின் உணவு அமிர்தமென்பது பொய்,
அன்று குல்ஃபி ஐஸ்கிரீமும் உண்டது.

தேவதைக்கு முக்காலமும் தெரியுமென்பது பொய்,
அன்று கைக்கடிகாரத்தில் தான் நேரம் பார்த்தது.

தேவதை ஆதித்தமிழில் பேசுமென்பது பொய்,
அன்று ஆங்கிலம் கலந்த தமிழிலும் பேசியது.

தேவதை காவல் தெய்வம் என்பது பொய்,
அன்று  மைவிழிகளால் என்னை வதைத்துக் கொண்டிருந்தது.

தேவதை வரங்கள் மட்டுமே தரும் என்பது பொய்,
அன்று ஒயில் நினைத்து துயில் தொலைக்கும் சாபம் தந்தது.

தேவதை அழகாய் இருக்குமென்பதும் பொய் தான்.
அன்று பேரழகாய் இருந்தது !!!